Í kjölfar yfirlýsingar forseta Íslands að vísa svo kölluðum Icesave lögum til þjóðarinnar hafa þingmenn Hreyfingarinnar sent frá sér eftirfarandi tilkynningu:

Þingmenn Hreyfingarinnar fagna ákvörðun forseta Íslands um að vísa nýjum Icesave lögum í dóm þjóðarinnar.  Með ákvörðun sinni hefur forsetinn greitt götu lýðræðisumbóta á Íslandi svo um munar og um leið sett ákveðið fordæmi um hvernig þjóðin sjálf geti kallað eftir atkvæðagreiðslu um tiltekin mál.

Nú ríður á að Alþingi samþykki sem fyrst frumvarp til laga um þjóðaratkvæðagreiðslur og ber svo við að tvö frumvörp liggja fyrir í þinginu í þeim efnum.  Annars vegar frumvarp forsætisráðherra sem gerir ráð fyrir því að meirihluti þingsins geti skotið málum í dóm þjóðarinnar með þingsályktunartillögu.  Hins vegar frumvarp Hreyfingarinnar þar sem vilji tiltekins minnihluta þingmanna nægir og að sama skapi er gert ráð fyrir að 10% kjósenda geti með undirskrift sinni krafist þjóðaratkvæðagreiðslu.  Gerlegt væri að sameina frumvörpin í eitt og afgreiða með skjótum hætti  sé vilji fyrir því.

Auk forsetans vilja Þingmenn Hreyfingarinnar þakka þeim fjölmörgu sem hafa lagt sitt af mörkum undanfarið í þágu lýðræðis.  Fyrst ber að nefna óþreytandi borgara sem hafa staðið vaktina á Austurvelli og víðar svo mánuðum skiptir.  Í kjölfar fundar sem haldinn var í sumar í Iðnó af borgarafundateyminu komst undirskriftasöfnun um þjóðaratkvæðagreiðslu um fyrri Icesave lög á góðan skrið og á endanum skrifuðu um 11 þúsund manns  undir þá áskorun á kjosa.is.  Að lokum ber að þakka InDefence hópnum sem, ásamt ofangreindum, á heiður skilinn.

5. janúar 2010

Birgitta Jónsdóttir,
Margrét Tryggvadóttir
og Þór Saari